‎عبد الرحمن الابنودي ‫-‬ الميدان

April 20, 2011

‎ايادي مصرية سمرا ليها في التمييز
‎ممددة وسط الزئير بتكسر البراويز
‎سطوع لصوت الجموع شوف مصر تحت الشمس
‎آن الآوان ترحلي يا دولة العواجيز
‎عواجيز شداد مسعورين اكلوا بلدنا اكل
‎ويشبهوا بعضهم نهم وخسة وشكل
‎طلع الشباب البديع قلبوا خريفها ربيع
‎وحققوا المعجزة صحوا القتيل من القتل
‎اقتلني قتلي ما هيعيد دولتك تاني
‎بكتب بدمي حياة تانية لأوطاني
‎دمي دة ولا الربيع الاتنين بلون اخضر
‎وببتسم من سعادتي ولا احزاني
‎تحاولوا ما تحاولوا ما تشوفوا وطن غيره

سلبتوا دم الوطن وبشيمته من خيره


أحلامنا بكرانا أصغر ضحكة على شفة


شفتوتش الصياد يا خلق بيقتلوا طيره
‎السوس بينخر وسارح تحت أشرافك


فرحان بيهم كنت وشايلهم على كتافك


وأما أهالينا من زرعوا وبنوا وصنعوا


كانوا مداس ليك ولولادك وأحلافك
‎ويا مصر يا مصر آن العليل رجعتله أنفاسه

وباس جبين للوطن ما للوطن داسه


من قبل موته بيوم صحوه أولاده


إن كان سبب علته محبته لناسه
‎الثورة فيضان قديم
محبوس مشافوش زول


الثورة لو جد متبانش فى كلام أو قول


تحلب وتعجن فى سرية تفور فى القلب وتنغزل فتلة فتلة فى ضمير النول
‎متخافش على مصر يا با مصر محروسة

حتى من التهمة دى اللى فينا مدسوسة

ولو أنت أبوها بصحيح وخايف عليها


ينده بقوة الوطن ويقلى قوم

أي تركتها ليه بدن بتنخره السوسة
‎وبيسرقوكى يا الوطن قدامنا عينى عينك فينك

ضحكت علينا الكتب بعدت بينا عنك

لولا ولادنا اللى قاموا يسددوا دينك

‎لكن خلاص يا وطن

صحيت جموع الخلق قبضوا على الشمس بأيديهم


وقالوا لا من المستحيل يفرطوا عقد الوطن تاني

والكدب تاني محال يلبس قناع الحق


بكل حب الحياة خوط في دم اخوك


قول أنت مين للي باعوا حلمنا وباعوك وأهانوك
‎وذلوك ولعبوا قمار بأحلامك


نيران هتافك تحرر صحبك الممسوك


يرجعلها صوتها مصر تعود ملامحها


تاخد مكانها القديم


والكون يصالحها عشرات السنين تسكونوا بالكدب فى عروقنا

والدنيا متقدمة ومصر مطرحها
‎كتبتوا أول سطور فى صفحة ثورة


وهما علما وخبرة مداورة ومناورة

وقعتوا فرعون هرب من قلب تمثاله

لكن جيوشه مازالوا بيحلموا ببكره
‎صباح حقيقي ودرس جديد أوي في الرفض


أتارى للشمس صوت وأتاري للأرض نبض


تانى معاكم رجعنا نحب كلمة مصر


تانى معاكم رجعنا نحب ضحكة بعض
‎مين كان يقول ابننا يطلع من النفق

دي صرخة ولا غنى وده دم ولا شفق


أتاريها حاجة بسيطة الثورة يا أخوانا


مين اللي شافها كده مين أول اللى بدأ
‎مش دول شاببنا اللي قالوا كرهوا أوطانهم


ولبسنا توب الحداد وبعدنا أوي عنهم


هما اللي قاموا النهارده يشعلوا الثورة


ويصنفوا الخلق مين عنهم ومين خانهم
‎يادي الميدان اللي حضن الذكرى وسهرها


يادي الميدان اللي فتن الخلق وسحرها

يادي الميدان اللي غاب اسمه كتير عنه وصبرها

ما بين عباد عاشقة وعباد كارهة
‎شباب كان الميدان أهله وعنوانه


ولا في الميدان نسكافيه ولا كابتشينو


خدوده عرفوا جمال النوم على الأسفلت


والموت عارفهم أوي وهما عارفينه
‎لا الظلم هين يا ناس ولا الشباب قاصر


مهما حاصرتوا الميدان عمروا ما يتحاصر


فكرتنى يا الميدان بزمان وسحر زمان


فكرتني بأغلى أيام فى زمن ناصر
‎شايل حياتك على كفك صغير السن


ليل بعد يوم المعاناة وأنت مش بتأن


جمل المحامل وأنت غاضض


بتعجب أمتي عرفت النضال


اسمحلي حاجة تجن
‎أتاريك جميل يا وطن مازلت وهتبقى


زال الضباب وانفجرت بأعلى صوت


لا حركتنا نبتسم ودفعت أنت الحساب


وبنبتسم بس بسمة طالعة بمشقة

‎فينك يا صبح الكرامة لما البشر هانوا


وأهل مصر الأصيلة اتخانوا واتهانوا


بنشتري العزة تاني والتمن غالي


فتح الوطن للجميع قلبوا وأحضانوا
‎الثورة غيض الأمل وغنوة الثوار


الليل إذا خانه لونه يتقلب لنهار


ضج الضجيج بالندا اصحى يا فجر الناس


فينك يا صوت الغلابة وضحكة الانفار
‎وإحنا وراهم أساتذة خايبة


تتعلم ازاي نحب الوطن وامتى نتكلم

لما طال الصدى قلبنا ويأسنا من فتحه


قلب الوطن قبلكم كان خاوي ومضلم
‎أولنا في لسة الجولة ورا جولة

ده سوس بينخر يا أبويا في جسد دولة


أيوه الملك صار كتابة إنما أبدا


لو غفلت عينا لحظة يقلبوا العملة
‎لكن خوفي مازال جوه الفؤاد يكبش


الخوف اللي ساكن شقوق القلب ومعشش


واللى مش راح يسيبه ولسه هيبقوا

وهيلاقولهم سكك وببان ما تتردش
‎وحاسبوا أوي من الديابة اللي في وسطيكم


وحاسبوا أوي من الديابة اللي في وسطيكم

وألا تبقى الخيانة منك وفيكم
‎الضحك على البق بس الرك على النيات

فيهم عدوين أشد من اللي حواليكم

  ٨ فبراير٢٠١١

قصيدة الميدان علي مسيقي راجح داوود

http://www.youtube.com/watch?v=Fk_HJmPReLQ&feature=share

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: